AC Raigañas: música e baile tradicional

Non puidemos ter mellor comezo para o noso PDI anual que a visita dos membros da Asociación Cultural Raigañas de Cerqueda.

O pasado luns 20 de setembro desfrutamos dos seus obradoiros de música e baile tradicional para achegarnos as nosas raíces, a nosa cultura; abrindo boca a un curso moi noso. Picando no seguinte enlace poderedes acceder as imaxes do día.

• Fotos da xornada

Agradecemos a visita de Rocío, Icía e David cos que gozamos do día ao son da gaita e a pandeireta, sen deixar de cantar e bailar.

Oralidade, berce da cultura!

BE_PDI&Oralidade_1ºT.2021/22

Leer más publicaciones en Calaméo

Presentamos a proposta de actividades deste 1º trimestre do curso en relación co PDI anual, Laboratorios de Aprendizaxe e conmemoracións.

Actividades para integrar nas Programacións de aula mediante Tarefas Integradas que se nutran de ALFIN, usando os espazos creativos da BE-LeoLab.

O título elexido, Oralidade: berce da cultura!, pon o acento na importancia da fala, da escoita como primeira forma de comunicación complexa, antes da escrita, que nos permite ser, estar en comunidade: contos, cantos, debates, asembleas....

Partimos da necesidade de coñecer e valorar as nosas tradicións e expresións orais: contos, lendas, mitos...parte do noso patrimonio, signo de identidade, que debemos preservar, tal e como marca o Obxectivo de Desenvolvemento Sustentable 11.4 da Axenda 2030: 

"Redobrar os esforzos para protexer e salvagardar o patrimonio cultural e natural do mundo"

A por un trimestre contando, 
a por un trimestre lendario!

Comezamos!

Inauguramos novo curso e novo Proxecto Documental Integrado (PDI) coa creación do presente blog como caderno de bitácora do que será a nosa travesía, o noso percorrido ao longo dos cursos 2021/22 e 2022/23 na busca, selección, organización, tratamento e comunicación da información arredor de NÓS, do noso Patrimonio Cultural e Inmaterial (PCI), tranformando as múltiples experiencias en coñecemento que nos permita medrar mirándonos no pasado para vivir o presente...na busca dun futuro mellor!

Pola importancia de saber de onde vimos, cara onde camiñamos, comezando polo máis próximo, polo que nos é noso: Malpica, vila da Costa da Morte na Comunidade Autónoma de Galicia.

Situándonos no mapa, comecemos pois a investigar, a documentarnos na procura de coñecer, de valorar, de respectar, de coidar de nós e do noso en comunidade.

Deseguro será... MATERIAL! (vocábulo malpicán para describir algo grandioso, fabuloso, fantástico)